ఆర్మీ క్యాంపులో ఆత్మాహుతి యత్నం..

0
2

ఇద్దరు ఉగ్రవాదుల హతం.. ముగ్గురు సైనికులు సైతం..!

గురువారం తెల్లవారుజామున ఇద్దరు ఉగ్రవాదులు ఆర్మీ క్యాంపులో చొరబడేందుకు ప్రయత్నించారు. ఈ విషయాన్ని గమనించిన సెంట్రీ.. కాల్పులు జరిపారు. అప్రమత్తమైన భద్రతా దళాలు ఇద్దరు ఉగ్రవాదులను మట్టుబెట్టగా.. కాల్పుల్లో ముగ్గురు సైనికులు సైతం ప్రాణాలు కోల్పోయారు. జమ్మూ కశ్మీర్లోని రాజౌరీ జిల్లాలోని పార్గల్ ఆర్మీ క్యాంప్ వద్ద ఈ ఘటన చోటు చేసుకుంది.

దేశ ప్రజలంతా స్వాతంత్య్ర దినోత్సవ సంబరాలకు సిద్ధమవుతున్న వేళ.. ఉగ్రమూకలు దేశంలోకి ప్రవేశించి పేలుళ్లకు ప్రయత్నించే అవకాశం ఉందని ఇంటెలిజెన్స్ వర్గాలు హెచ్చరించాయి. దీంతో దేశరాజధాని ఢిల్లీతోపాటు ముఖ్యనగరాల్లో భద్రతను కట్టుదిట్టం చేశారు. ఈ క్రమంలోనే గురువారం తెల్లవారుజామున.. రాజౌరీలోని పార్గల్‌లో ఉన్న ఆర్మీ క్యాంపులోకి ఇద్దరు ఉగ్రవాదులు చొరబడేందుకు ప్రయత్నించాయి. దీంతో అప్రమత్తమైన భద్రతా దళాలు వారిని మట్టుబెట్టాయి. ఈ క్రమంలో ముగ్గురు భద్రతా సిబ్బంది సైతం వీరమరణం పొందారు.

ఆ ప్రాంతాన్ని తమ అదుపులోకి తీసుకున్న భద్రతా బలగాలు.. ఉగ్రవాదుల కోసం జల్లెడ పడుతున్నాయి. గురువారం వేకువ జామున కంచెను దాటుకొని వచ్చిన కొందరు బుధ్ కనడి సమీపంలోని పార్గల్‌ వద్దనున్న ఆర్మీ క్యాంపులోకి ప్రవేశించడానికి ప్రయత్నించారని ఆర్మీ వర్గాలు వెల్లడించాయి. విధి నిర్వహణలో ఉన్న సెంట్రీ గార్డుపై కాల్పులు జరిపారని.. దీంతో అప్రమత్తమైన భద్రతా దళాలు ఎదురు కాల్పులు జరిపాయని తెలిపారు. సమాచారం అందుకున్న ఆర్మీ అధికారులు అదనపు బలగాలను ఆ ప్రాంతానికి పంపారు. ఈ ప్రదేశం దర్హల్ పోలీసు స్టేషన్ నుంచి 6 కిలోమీటర్ల దూరంలో ఉందని జమ్మూ జోన్ అడిషనల్ డీఐజీ ముకేశ్ సింగ్ తెలిపారు.


ఇద్దరు ఉగ్రవాదులు రాజౌరీలోని పార్గల్ వద్ద ఆర్మీ పోస్టులోకి చొరబడే ప్రయత్నం చేశారు. ఈ క్రమంలో సైన్యం వారిని మట్టుబెట్టింది. ఐదుగురు సైనికులకు సైతం గాయాలయ్యాయని ఆర్మీకి చెందిన 16 కార్ప్స్ ట్విట్టర్ ద్వారా వెల్లడించింది. వేకువ జామున 3.30 గంటలకు ఉగ్రవాదులు ఆత్మాహుతి దాడికి ప్రయత్నించగా… ఆర్మీ దాన్ని విఫలం చేసిందని సైనికాధికారులు తెలిపారు. ఈ దాడి చేసింది లష్కరే తొయిబా ఉగ్రవాదులని భావిస్తున్నారు.

LEAVE A REPLY

Please enter your comment!
Please enter your name here