పండంటి బిడ్డకు జన్మనిచ్చిన 70 ఏళ్ల మహిళ..

0
5

అల్వార్‌కు చెందిన చంద్రావతి, గోపి సింగ్ దంపతులకు వివాహం జరిగి 54 ఏళ్లు అయ్యింది. అయినా వీరికి పిల్లలు పుట్టలేదు. పిల్లల కోసం ఆ తల్లి ఎన్నో కలలు కన్నది చివరికి వారి కలను టెక్నాలజీ నేరవేర్చింది. మాతృత్వపు మధురిమల కోసం అల్లాడిపోతున్న చంద్రావతి దంపతులకు అల్వార్‌లోని ఓ ఐవీఎఫ్ సెంటర్ వైద్యులు అభయమిచ్చారు. ఐవీఎఫ్ ద్వారా మూడో ప్రయత్నంలో పండంటి మగ బిడ్డకు ఆ దంపతులు జన్మనివ్వడం విశేషం.

తల్లి కావడం గొప్ప వరం అంటారు. పెళ్లైన అయిన ప్రతీ మహిళా తల్లి కావాలని కోరుకుంటుంది. బిడ్డతో అమ్మాని పిలిపించుకోవాలని ప్రతీ మహిళ పరితపించిపోతుంది. పొత్తిల్లలో తన బిడ్డను ఎత్తుకొని సంబర పడుతుంది. కానీ వివాహమై ఏళ్లు గడుస్తున్నా తల్లి కాకపోతే ఆ మహిళ పడే బాధ వర్ణనాతీతం. ఏ శుభకార్యాలకు వెళ్దామన్నా గొడ్రాలు అంటూ నిందలు వేస్తుంటే మానసికంగా కుంగిపోతుంది. ఆస్పత్రుల చుట్టూ తిరిగి చికిత్సలు చేయించుకుని ఎన్నో ప్రయత్నాలు చేసినా పిల్లలు లేకపోతే ఆ దంపతులు పడే బాధ చెప్పలేనింది. ఇలా పిల్లల కోసం ప్రయత్నించి.. పెళ్లయిన 54 సంవత్సరాల తర్వాత ఓ మహిళ బిడ్డకు జన్మనిచ్చింది. ఆమె పూజలు, నోములు ఇన్నాళ్లకు ఫలించి చివరికి డెబ్బైయో ఏటా సంతానం ప్రాప్తించింది. అరుదైన ఈ సంఘటన రాజస్థాన్‌లోని అల్వార్‌లో చోటు చేసుకుంది.

అల్వార్‌కు చెందిన చంద్రావతి, గోపి సింగ్ దంపతులు కృత్రిమ గర్భధారణ ద్వారా మూడో ప్రయత్నంలో పండంటి బాబుకు జన్మనిచ్చారు. వివాహమైన 54 ఏళ్ల తర్వాత దేవుడు కరుణించడంతో ఐవీఎఫ్ విధానంతో బిడ్డను కన్న ఆ దంపతుల ఆనందానికి అవధుల్లేవు. 70 ఏళ్ల వయసులో గర్భం దాల్చడం చాలా రిస్క్ అని వైద్యులు సూచించినా.. చంద్రావతి మాత్రం పిల్లలు కావాలనే పట్టుదలతో ఐవీఎఫ్‌కు సిద్ధమయ్యింది. నిపుణులైన వైద్యుల పర్యవేక్షణలో ఐవీఎఫ్ ద్వారా గర్బం దాల్చిన చంద్రావతి ఆగస్టు 8న సిజేరియన్ ద్వారా మగబిడ్డను ప్రసవించారు.

అల్వార్ ఇండో ఐవీఎఫ్ టెస్ట్ ట్యూబ్ బేబీ సెంటర్ సైంటిఫిక్ డైరెక్టర్ డాక్టర్ పంకజ్ గుప్తా మాట్లాడుతూ.. చంద్రావతి, గోపి సింగ్ దంపతులు ఝన్‌ఝన్ జిల్లా సింఘానాకు చెందినవారని తెలిపారు. చంద్రావతికి 70, గోపి సింగ్‌కు 75 ఏళ్లని, వివాహమై 50 ఏళ్లు గడిచిపోయినా పిల్లలు లేకపోవడంతో అసంతృప్తి వెంటాందని, చాలాచోట్ల చికిత్స తీసుకున్నా ఫలితం లేకపోయిందన్నారు. దాదాపు రెండేళ్ల కిందట బంధువుతో కలిసి తమ హాస్పిటల్‌కు వచ్చారని, అప్పటి నుంచి చికిత్స ప్రారంభించామని డాక్టర్ గుప్తా పేర్కొన్నారు. ఐవీఎఫ్ మూడో ప్రయత్నంలో 9 నెలల కిందట చంద్రావతి గర్బం దాల్చిందని అన్నారు. గర్భవతి అయ్యిందని ఆనందించినా కానీ, వయసు పైబడటంతో తొమ్మిది నెలలు గర్బాన్ని మోసి ప్రసవం సాధ్యమవుతుందనే భయపడ్డామని చెప్పారు. కానీ, చివరకు దేవుడి దయ వల్ల అంతా సాఫీగా జరిగి సోమవారం సిజేరియన్ చేసి బిడ్డను బయటకు తీశామని, తల్లీబిడ్డ ఇద్దరూ ఆరోగ్యంగా ఉన్నారని వివరించారు.

ఆర్మీలో సైనికుడిగా పనిచేసి 40 ఏళ్ల కిందటే గోపి సింగ్ రిటైరయ్యారు. బంగ్లాదేశ్ యుద్ధంలో పాల్గొని పాక్ తూటాలకు గాయపడ్డారు. పెళ్లైన దాదాపు 55 ఏళ్ల తర్వాత దంపతులకు సంతానం కలగడంతో ఆ ఇంట సంతోషం వెల్లివిరిసింది. యాదృశ్చికంగా చంద్రావతికి సిజేరియన్ చేసిన డాక్టర్ రీనా యాదవ్ కూడా సైన్యంలో పనిచేయడం విశేషం.

LEAVE A REPLY

Please enter your comment!
Please enter your name here