ముఖ్యమంత్రి కేసీఆర్ పై ఈటల రాజేందర్ సెటైర్లు

0
6
eetala rajendar

 ముఖ్యమంత్రి కేసీఆర్‌ ఉంటే ప్రగతిభవన్‌లో.. లేకపోతే ఫామ్‌హౌస్‌లో ఉంటారని బీజేపీ ఎమ్మెల్యే ఈటల రాజేందర్ విమర్శించారు. ప్రజల కష్టాలు తెలుసుకునేందుకు మాత్రం రారని ఫైర్ అయ్యారు. ఈ 8 ఏళ్ల పాలనలో ప్రధాని మోదీ ఒక్కరోజు కూడా సెలవు తీసుకోలేదని.. 8 ఏళ్ల పాలనలో సీఎం కేసీఆర్‌ ఒక్కరోజు కూడా సచివాలయానికి రాలేదని వ్యాఖ్యానించారు. ఎనిమిదేళ్లలో సాధారణ ప్రజలు కేసీఆర్ ను కలిసే భాగ్యం దక్కిందా? అని ఈటల రాజేందర్ ప్రశ్నించారు.

యాదగిరిగుట్టలో బీజేపీ తెలంగాణ చీఫ్ బండి సంజయ్‌ మూడో విడత ప్రజా సంగ్రామ యాత్ర ప్రారంభం సందర్భంగా నిర్వహించిన సభలో.. తెలంగాణ ప్రభుత్వంపై ఈటల రాజేందర్ ఘాటు వ్యాఖ్యలు చేశారు. కుమారుడిని ముఖ్యమంత్రి చేయడమే కేసీఆర్‌ ఏకైక లక్ష్యమని ఈటల ఆరోపించారు. తెలంగాణలో టీఆర్ఎస్ రాజ్యాంగమే నడవాలన్నట్లు ప్రభుత్వ వైఖరి ఉందని వ్యాఖ్యానించారు. కేసీఆర్‌ పాలనలో సామాజిక న్యాయం లేదని.. అన్ని వర్గాల ప్రజలు ఇబ్బందులు పడుతున్నారని ఈటల రాజేందర్ విమర్శించారు.

బీజేపీపై టీఆర్ఎస్ నేతలు అన్ని అబద్ధాలు ప్రచారం చేస్తున్నారని ఈటల రాజేందర్ వ్యాఖ్యానించారు. రాష్ట్రంలో వరదలు వచ్చినా కేసీఆర్‌ పట్టించుకోలేదన్న ఈటల.. ఢిల్లీలో చక్రం తిప్పడం కాదు, ఉన్న ఉద్యోగం కూడా ఊడుతుందని స్పష్టం చేశారు. దళితుల జీవితాల్లో కేసీఆర్ మట్టి కొడుతున్నారని ఈటల ఆవేదన వ్యక్తం చేశారు. దళితుల అసైన్డ్‌ భూములను లాక్కుంటున్నారని ఆరోపించారు. అటవీ శాఖ భూముల పేరుతో గిరిజనుల భూములు గుంజుకుంటున్నారని ఆగ్రహం వ్యక్తం చేశారు.

ప్రస్తుతం ఉన్న మంత్రుల్లో సగం మంది తెలంగాణ వద్దన్న వాళ్లేనని ఈటల రాజేందర్ కీలక వ్యాఖ్యలు. ఎంతమంది తెలంగాణ ఉద్యమంలో పాల్గొన్నారో కేసీఆర్ చెప్పాలని డిమాండ్ చేశారు. ఎంతమంది ఉద్యమకారులు టీఆర్ఎస్ పార్టీని వీడి వెళ్లారో.. ఎందుకు వెళ్లారో ప్రజలు ఆలోచించారు ఈటల రాజేందర్ విజ్ఞప్తి చేశారు. ముఖ్యమంత్రి కేసీఆర్‌కు బుద్ధి చెప్పే అవకాశం నల్గొండలో రాబోతోందని ఈటల వ్యాఖ్యానించారు. కేసీఆర్‌ పరిపాలన అంతమొందించడమే భారతీయ జనతా పార్టీ కర్తవ్యమని ఈటల రాజేందర్ స్పష్టం చేశారు.కాంగ్రెస్ పార్టీపైనా ఈటల రాజేందర్ కీలక వ్యాఖ్యలు చేశారు. దేశవ్యాప్తంగా కాంగ్రెస్‌ పార్టీ అంతరించిపోయిందని సెటైర్లు వేశారు. కాంగ్రెస్‌కు మూలమైన ఉత్తరప్రదేశ్ లోనే 2 సీట్లు వచ్చాయని ఎద్దేవా చేశారు. ఈ స్థితిలో ఉన్న కాంగ్రెస్‌ పార్టీ నేతలు.. అధికారంలోకి వస్తారని ఎలా మిడిసి పడుతున్నారని ప్రశ్నించారు. చాలామంది టీఆర్ఎస్ నేతలు బీజేపీలో చేరేందుకు రంగం సిద్ధం చేసుకుంటున్నారని సంచలన వ్యాఖ్యలు చేశారు. తెలంగాణలో కాంగ్రెస్, టీఆర్ఎస్ పార్టీలను ఖతం చేసేది ఒక్క బీజేపీనే అని ఈటల రాజేందర్ స్పష్టం చేశారు.

LEAVE A REPLY

Please enter your comment!
Please enter your name here