మూడో విడత ప్రజా సంగ్రామ యాత్ర ప్రారంభం

0
7
bandi sanjay

తెలంగాణ రాష్ట్రాంలో బీజేపీ ఎక్కడుంది అని అడిగిన వాళ్లకి.. పాలమూరులో చూపించామని.. ఆ తర్వాత నల్గొడ, ఖమ్మం జిల్లాల్లో కూడా చూపిస్తామని తెలంగాణ బీజేపీ చీఫ్ బండి సంజయ్ స్పష్టం చేశారు. మూడో విడత ప్రజా సంగ్రామ యాత్ర యాదగిరిగుట్ట శ్రీలక్ష్మీనరసింహస్వామి వారి సన్నిధి నుంచి ప్రారంభమైంది. ఈ సందర్భంగా బండి సంజయ్ కీలక కామెంట్స్ చేశారు. తెలంగాణ రాష్ట్రంలో ఎన్నికలు ఎప్పుడు వచ్చినా.. ఎగిరేది కాషాయ జెండానే అని వ్యాఖ్యానించారు.కేంద్రమంత్రి గజేంద్ర సింగ్ షెకావత్ తెలంగాణకు వచ్చే షెడ్యూల్ 3 రోజుల ముందే తెలిసిందని.. కానీ కేసీఆర్ షెడ్యూల్ మాత్రం ఎవ్వరికీ తెలియదని ఆరోపించారు బండి సంజయ్. జఫర్ సన్ స్క్రాచ్ కోసమే కేసీఆర్ ఢిల్లీకి పోయారని ఎద్దేవా చేశారు. తెలంగాణలో గొల్కొండ కోటపై కాషాయ జెండా ఎగిరేశాక సీఎం ఎవరైనా సరే… మొట్టమొదట దర్శించుకునేది పాతబస్తీలోని భాగ్యలక్ష్మి అమ్మవారినే అని బండి కీలక వ్యాఖ్యలు చేశారు. ప్రతి బీజేపీ కార్యకర్త లక్ష్మీనరసింహ స్వామి అవతారమెత్తి.. కేసీఆర్ ను తరిమికొట్టాలని పిలుపునిచ్చారు.

ఉద్యమాల గడ్డ నల్గొండ జిల్లా నుంచి 3వ విడత పాదయాత్ర అంటే కేసీఆర్ భయపడుతున్నారని బండి సంజయ్ వ్యాఖ్యానించారు. యాదాద్రి ఆలయ నిర్మాణం పేరుతో కేసీఆర్ నాణ్యత లేని పనులు చేయించారని ఆరోపించారు. తెలంగాణ రాష్ట్రంలో రాక్షస పాలన కొనసాగుతోందని ఫైర్ అయ్యారు. ప్రజలు తీవ్ర ఇబ్బందులు పడుతున్నారని వ్యాఖ్యానించారు. బుక్కెడు బువ్వకోసం బాసర ట్రిపుల్ ఐటీ గురుకుల పాఠశాలల విద్యార్థులు ఏడుస్తున్నారని ఆవేదన వ్యక్తం చేశారు. గురుకుల పాఠశాలల్లో పురుగుల అన్నం పెడుతున్నారని.. అదే అన్నం కేసీఆర్ మనుమడు తింటున్నారా అని ప్రశ్నించారు.

తెలంగాణలో ఏమీ చేయలేని కేసీఆర్ .. ఢిల్లీకి పోయి ఏం చేస్తారని బండి సంజయ్ ప్రశ్నించారు. రైతు రుణమాఫీ ఏమైంది? దళితులకు 3 ఎకరాల భూమి ఏమైందని ప్రశ్నించారు. రైతు బంధు ఎంతమందికి వచ్చిందని నిలదీశారు. వాసాలమర్రిలో 100 హామీలిచ్చి.. ఒక్క హామీ నెరవేర్చలేదని ఫైర్ అయ్యారు. యాదాద్రిలో బీజేపీ బహిరంగసభ అనేసరికి.. చేనేత బీమా అని ప్రకటించారని వ్యాఖ్యానించారు. కేసీఆర్ చేతకాని, మూర్ఖపు పాలన వల్ల 2000 మంది చేనేత కార్మికులు మరణించారని బండి సంజయ్ ఆవేదన వ్యక్తం చేశారు.

తెలంగాణలో డ్రగ్స్ మాఫియా, క్యాసినో వంటి వాటిలో టీఆర్ఎస్ నేతలే ఉన్నారని బండి సంజయ్ సంచలన ఆరోపణలు చేశారు. నయీమ్ కేసులో స్వాధీనం చేసుకున్న పత్రాలు, డబ్బు ఏమయ్యాయని ప్రశ్నించారు. బీజేపీ అధికారంలోకి వచ్చాక అన్నీ కక్కిస్తామని వ్యాఖ్యానించారు. ప్రణాళిక లేకుండా కట్టిన కాళేశ్వరం ప్రాజెక్టుతో లక్షల ఎకరాల మునుగుతున్నాయని.. ఏ మొహం పెట్టుకొని అలాంటి ప్రాజెక్టుకు జాతీయ హోదా అడుగుతున్నారని నిలదీశారు. కేంద్రం ఇస్తున్న నిధులను దారి మళ్లిస్తున్న విషయాలను ప్రజలకు చెప్పేందుకే.. మూడో విడత పాదయాత్ర చేస్తున్నామని.. కల్వకుంట్ల రాజ్యాంగాన్ని బొందపెట్టి, బాబా సాహెబ్ అంబేద్కర్ రాజ్యాంగాన్ని అమలు చేస్తామన్నారు.

LEAVE A REPLY

Please enter your comment!
Please enter your name here