రూ.17వేల కోట్ల విద్యుత్ బకాయిలు..

0
6

అందరికీ ఆదర్శంగా ఉండాల్సిన ప్రభుత్వ శాఖలు విద్యుత్ బకాయిలు ఎగ్గొడుతున్నాయి. నాలుగు ప్రభుత్వ శాఖలు కలిపి ఏకంగా రూ.17వేల కోట్లు బకాయిలు పడినట్లు తెలుస్తోంది.

సామాన్య ప్రజల నుంచి ముక్కుపిండి బిల్లులు వసూలు చేసే రాష్ట్ర విద్యుత్ పంపిణీ సంస్థలకు ప్రభుత్వంలోని వివిధ శాఖలు షాకిస్తున్నాయి. డిస్కంల నుంచి పెద్దమొత్తంలో కరెంటు వాడుకుని బిల్లులు కట్టకుండా సతాయిస్తున్నాయి. దీంతో డిస్కంలు ఆర్థిక సమస్యలతో కొట్టుమిట్టాడుతూ చివరికి ఉద్యోగులకు జీతాలు ఇవ్వలేని పరిస్థితి నెలకొంది. నీటిపారుదల, పంచాయతీరాజ్‌, పురపాలక శాఖలతో పాటు వాటర్‌ బోర్డు విభాగాలు డిస్కంలకు ఏకంగా రూ.17 వేల కోట్ల కరెంటు బిల్లులు చెల్లించాల్సి ఉంది. సాధారణ వినియోగదారులు వరుసగా మూడు నెలలు బిల్లు కట్టకపోతే విద్యుత్ సంస్థలు కరెంట్ సరఫరా నిలిపివేసి వేధిస్తుంటాయి. అయితే ప్రభుత్వానికి చెంగిన వివిధ శాఖల నుంచి రూ.వేల కోట్ల బిల్లులు పెండింగ్‌లో ఉన్నా విద్యుత్ శాఖ అధికారులు నోరు మెదపకపోవడం ఆశ్చర్యానికి గురిచేస్తోంది.

మార్చి 31వ తేదీ వరకు పంచాయతీరాజ్‌ శాఖ ఎల్‌టీ విభాగం రూ.3,580 కోట్లు.. హైటెన్షన్‌లో గ్రామీణ తాగు నీటి సరఫరా పంపుల కోసం వాడిన కరెంటుకు రూ.1,633 కోట్లు కట్టాల్సి ఉంది. దీంతో పాటు నీటిపారుదల శాఖ ఎత్తిపోతల పథకాల పంపుల బిల్లులు రూ.7,483 కోట్ల దాకా బకాయి ఉన్నాయి. జంట నగరాలకు తాగునీటిని అందించే వాటర్‌బోర్డు రూ.2,256 కోట్లు, పురపాలక శాఖ ఎల్‌టీలో రూ.1,037 కోట్లు.. హెచ్‌టీలో రూ.293 కోట్లు చెల్లించాలి. అన్ని శాఖల బిల్లులు కలిపి మొత్తం రూ.16,282 కోట్ల బిల్లులు చెల్లించాల్సి ఉంది. జూన్ నెలాఖరుకు ఈ బాకాయిలన్నీ రూ.17వేల కోట్లు దాటేశాయని అంచనా.

అయితే అన్ని వేల కోట్ల రూపాయల బాకీలున్నా డిస్కంలు వసూలు చేయకపోవడం, చూసీచూడనట్లు వ్యవహరించడం విమర్శలు దారితీస్తోంది. గతేడాది నవంబరు, డిసెంబరులో ప్రభుత్వ శాఖల కరెంటు బిల్లుల వసూలు కోసం డిస్కంలు భారీ డ్రైవ్‌ నిర్వహించాయి. డిసెంబరులో జనగామ జిల్లా కేంద్రంలో 15 ప్రభుత్వ కార్యాలయాలకు కరెంటు కట్‌ చేశాయి. హైదరాబాద్‌లోని శిల్పారామానికి కూడా కరెంటు ఆపేశాయి. దీంతో డిస్కంలపై ప్రభుత్వం కన్నెర్ర చేసింది. ఈ క్రమంలో ప్రభుత్వ శాఖలకు కరెంటు కట్‌ చేయొద్దనే సర్క్యులర్లు గతేడాది డిసెంబరులో క్షేత్రస్థాయి యంత్రాంగానికి చేరాయి. ఈ నేపథ్యంలో బకాయిల వసూలుకు వెనకడుగు వేస్తున్నట్లు తెలుస్తోంది.

LEAVE A REPLY

Please enter your comment!
Please enter your name here