తెలంగాణలోని పలు ప్రాంతాల్లో మంగళవారం ఓ మోస్తరు, బుధవారం భారీ వర్షాలు కురుస్తాయని వాతావరణ శాఖ వెల్లడించింది. ఉత్తర, దక్షిణ భారత ప్రాంతాల మధ్య 900 మీటర్ల ఎత్తున గాలులతో ఉపరితలద్రోణి ఏర్పడిందని, ఇది ఛత్తీస్‌గఢ్‌ నుంచి తెలంగాణ మీదుగా శ్రీలంక సమీపంలో కోమరీన్‌ ప్రాంతం వరకూ విస్తరించిందని తెలిపింది. మరోవైపు తమిళనాడుపై 1500 మీటర్ల ఎత్తున గాలులతో ఉపరితల ఆవర్తనం ఏర్పడింది. తెలంగాణలో రుతుపవనాల కదలికలు సాధారణంగా ఉంది. వీటి ప్రభావంతో మంగళవారం ఒక మోస్తరుగా, బుధవారం భారీ వర్షాలు కురిసే అవకాశాలున్నాయని వాతావరణశాఖ తెలిపింది.
సోమవారం ఉదయం 8 నుంచి రాత్రి 8 గంటల వరకూ పలు ప్రాంతాల్లో భారీ వర్షాలు కురిశాయి. వికారాబాద్ జిల్లా బంట్వారంలో అత్యధికంగా 9.3 సెంటీమీటర్ల వర్షపాతం నమోదైంది. హైదరాబాద్‌లోని ఈస్ట్‌ ఆనంద్‌బాగ్‌‌లో 8.4, వెస్ట్‌ మారేడ్‌పల్లిలో 8.1, మధుసూదన్‌నగర్‌లో 6.9, ఉప్పల్‌ రాజీవ్‌నగర్‌లో 5.9, వరంగల్‌ జిల్లా పైడిపల్లిలో 6.4, జనగామ జిల్లాలోని అబ్దుల్‌ నాగారంలో 6.3 సెంటీమీటర్ల వర్షం కురిసింది. సోమవారం హైదరాబాద్‌లోని చాలా ప్రాంతాల్లో సుమారు గంటసేపు భారీ వర్షం కురిసింది. అయితే అనూహ్యంగా మధ్యాహ్నం మళ్లీ ఎండ కాసింది. భారీవర్షం కారణంగా అనేక ప్రాంతాల్లో రోడ్లపై నీరు చేరడంతో వాహనదారులు తీవ్ర ఇబ్బందులు పడ్డారు.
