శ్రీనివాస్ ఎపిసోడ్‌కు ముగింపు కార్డ్..

0
3




విశాఖ సాయిప్రియ ఎపిసోడ్‌కు ఎండ్ కార్డ్ పడిపోయింది. సాయిప్రియను ప్రియుడితో పంపించేశారు. ఆమె భర్త శ్రీనివాస్ పోలీస్ స్టేషన్‌కు రాకపోవడంతో ఈ నిర్ణయం తీసుకున్నారు. సాయిప్రియమేజర్ కావడంతో ఆమె ఇష్టం మేరకు ప్రియుడితో వెళ్లిపోయింది. సమాజానికి క్షమాపణలు అంటూ ఆమె వేడుకున్నారు. శ్రీనివాస్‌తో పెళ్లి ఇష్టం లేదని చెప్పానని చిన్నప్పటి నుంచి రవిని ఇష్ట పడ్డానన్నారు. తమను బ్రతకనివ్వాలని.. తాను చదువుకున్నానని, ఉద్యోగం చేసి పోషిస్తానని ప్రియుడు రవి అంటున్నాడు. తమ వలన ఇబ్బంది పడిన వారందరికీ క్షమాపణ చెబుతున్నామని ప్రత్యేకంగా క్షమాపణ కోరుతున్నామన్నారు.

శ్రీనివాస్ పెళ్లి రోజు గిఫ్ట్ గా ఇచ్చిన బంగారు గాజులు ఆయనకే ఇచ్చేస్తానన్నారు. ఆ గాజులను అమ్మలేదని.. తమ వద్దే ఉన్నాయని చూపించారు. ముందుగా కుమార్తె సాయిప్రియతో తల్లిదండ్రులు మాట్లాడారు.. తమ పరువు తీశావని కన్నీళ్లు పెట్టుకున్నారు. తాను రవితో ఉంటానని ఆమె తేల్చి చెప్పింది.. తమ వల్ల ప్రభుత్వానికి కోటి రూపాయలు ఖర్చయినందుకు క్షమించమని కోరారు. ఈ క్రమంలో సాయిప్రియ సొమ్మసిల్లి పడిపోయింది.. ఆమెకు సపర్యలు చేయగా తేరుకుంది.

విశాఖ ఎన్.ఎ.డి. సమీపంలోని సంజీవయ్య నగర్‌‌కు చెందిన 22 ఏళ్ల సాయిప్రియకు రెండేళ్ల క్రితం శ్రీకాకుళం జిల్లాకు చెందిన శ్రీనివాసరావుతో వివాహం జరిగింది. సాయిప్రియ సంజీవయ్యనగర్‌లోనే ఉంటుండగా.. శ్రీనివాసరావు హైదరాబాద్‌లో ఉద్యోగం చేస్తున్నాడు. ఈనెల 25న పెళ్లిరోజు కావడంతో భార్యాభర్తలు సాయంత్రం ఆర్కే బీచ్‌కు వెళ్లారు. రాత్రి 7.30 గంటల సమయంలో తిరిగి వెళ్లిపోదామని అనుకుంటుండగా.. శ్రీనివాసరావుకు ఫోన్‌ రావడంతో పక్కకు వెళ్లి మాట్లాడి తిరిగి వచ్చేలోపు భార్య కనిపించలేదు. దీనిపై సాయిప్రియ తండ్రి పోలీసులకు ఫిర్యాదు చేశారు. రెండు రోజులపాటు నేవీ హెలికాప్టర్‌, స్పీడ్ బోట్లతో సాయిప్రియ ఆచూకీ కోసం గాలించారు.

అంతా అనుమానం వ్యక్తం చేసినట్టుగానే ఆమె బీచ్‌లో గల్లంతవ్వలేదు. సాయిప్రియ సురక్షితంగానే ఉన్నట్టు బుధవారం ఆమె బంధువులు గుర్తించారు. మొదట ఆమె నెల్లూరు ఉందని.. ఆమె ఆఖరి ఫోన్ కాల్‌ ఆధారంగా ఆమె కావలిలో ఉన్నట్టు పోలీసులు గుర్తించారని వార్తలు వచ్చాయి. అయితే, చివరికి ఆమె కర్ణాటకలోని బెంగళూరులో ఉన్నట్టు నిర్ధారణ అయ్యింది. బుధవారం రాత్రి సాయిప్రియ స్వయంగా తన తండ్రికి వాట్సాప్‌లో వాయిస్ మెసేజ్‌లు పంపింది.

రవితో తాను బెంగళూరులో క్షేమంగానే ఉన్నానని.. తన కోసం వెతకొద్దని సాయిప్రియ వాయిస్ మెసేజ్‌లో వెల్లడించింది. రవితో తనకు పెళ్లయిపోయిందని కూడా తెలిపింది. తాళిబొట్టుతో ఉన్న ఫొటోను తల్లిదండ్రులకు వాట్సాప్‌లో పంపింది. రవితో ఇష్టపూర్వకంగానే వెళ్లానని.. తన కోసం వెతికితే చనిపోతానని హెచ్చరించింది. తర్వాత పోలీసులు ఆమెను విశాఖ తీసుకొచ్చారు.. కౌన్సిలింగ్ ఇవ్వాలని భావించారు. కానీ భర్త రాకపోవడంతో ఆమెను ప్రియుడితో పంపించేశారు.

LEAVE A REPLY

Please enter your comment!
Please enter your name here