Bihar పర్యటనకు కేసీఆర్..

0
3

 థర్డ్ ఫ్రంట్‌పై మళ్లీ చిగురిస్తున్న ఆశలు!’

తెలంగాణ ముఖ్యమంత్రి కేసీఆర్ బీహార్ పర్యటనకు వెళ్లనున్నారు. శనివారం రాత్రి ప్రత్యేక విమానంలో పాట్నా బయలుదేరి వెళ్లనున్న ఆయన రాత్రికి అక్కడే బస చేస్తారు. ఆదివారం వివిధ కార్యక్రమాల్లో పాల్గొని సాయంత్రానికి హైదరాబాద్ తిరుగు ప్రయాణమవుతారు. ఈ పర్యటనలో భాగంగా బీహార్ ముఖ్యమంత్రి నితీష్‌కుమార్, ఉపముఖ్యమంత్రి తేజస్వి యాదవ్‌లను మర్యాదపూర్వకంగా కలిసే అవకాశముంది. ఈ క్రమంలోనే వారితో గల్వాన్ లోయలో అమరులైన జవాన్ల కుటుంబాలకు తెలంగాణ ప్రభుత్వం తరపున ఆర్థిక సాయాన్ని అందించనున్నారు.

కేంద్రంలో బీజేపీకి వ్యతిరేకంగా కూటమి ప్రయత్నాల్లో ఉన్న కేసీఆర్ వివిధ రాష్ట్రాల్లో పర్యటించి కీలక నేతలతో భేటీ అవుతున్న సంగతి తెలిసిందే. బీహార్‌లో ఇన్నాళ్లూ బీజేపీ మద్దతుతో ప్రభుత్వాన్ని నడిపిన ఆయన.. ఇటీవల ఆ పార్టీకి గుడ్‌బై చెప్పేశారు. ఆ వెంటనే ఆర్జేడీ మద్దతుతో ప్రభుత్వాన్ని ఏర్పాటు చేసి ఎనిమిదోసారి సీఎంగా ప్రమాణస్వీకారం చేశారు. లాలూప్రసాద్ యాదవ్ కుమారుడు, ఆర్జేడీ నేత తేజస్వి యాదవ్‌కు ఉపముఖ్యమంత్రి పదవి కట్టబెట్టారు. బీజేపీతో కూటమిలో ఉన్నన్ని రోజులు నితీష్‌‌కుమార్‌ని లైట్ తీసుకున్న కేసీఆర్.. ప్రస్తుత పరిస్థితుల్లో ఆయన్ని కలవడం ప్రాధాన్యత సంతరించుకుంది.

దేశవ్యాప్తంగా బీజేపీ వ్యతిరేక పార్టీలతో కలిసి కూటమి ప్రయత్నాల్లో ఉన్న కేసీఆర్.. ఇప్పుడు బిహార్ నుంచే తన జాతీయ ప్రత్యామ్నాయ రాజకీయ ఎజెండా ప్రయత్నాలను ప్రారంభించనున్నారు. గతంలో ఢిల్లీ, ఉత్తరప్రదేశ్, పశ్చిమబెంగాల్, మహారాష్ట్ర, తమిళనాడు తదితర రాష్ట్రాల్లోని ప్రాంతీయ పార్టీల నేతలతో సంప్రదింపులు జరిపిన కేసీఆర్… ఇప్పుడు బీజేపీ-జేడీయూ మధ్య బంధం తెగిపోయిన వెంటనే బీహార్ వెళ్ళి నితీష్, తేజస్విలతో భేటీ కానుండటం విశేషం.

కేసీఆర్ బీహార్ పర్యటనకు ప్రభుత్వం నుంచి ఇప్పటివరకు ఎలాంటి అధికారిక సమాచారం రాలేదు. కేసీఆర్ ఈ నెల 14న వికారాబాద్ జిల్లా కలెక్టర్ కార్యాలయాన్ని ప్రారంభించనున్నట్లు సీఎంవో వర్గాలు ప్రకటించాయి. అయితే బీహార్ పర్యటన కారణంగానే ఆ కార్యక్రమాన్ని 16కి వాయిదా వేసినట్లు టీఆర్ఎస్ వర్గాలు చెబుతున్నాయి.

LEAVE A REPLY

Please enter your comment!
Please enter your name here