Smartphones చైనా ఫోన్లపై భారత్ నిషేధం!?

0
7

కేంద్ర ప్రభుత్వం చైనా ఫోన్లపై నిషేధం విధించబోతోందా? వెలువడుతున్న నివేదికల ప్రకారం చూస్తే.. అవుననే సమాధానం వినిపిస్తోంది. రూ.12 వేల ధరలోపు విభాగంలో ఫోన్లను విక్రయించకుండా చైనా కంపెనీలపై ఆంక్షలు విధించాలని ప్రభుత్వం భావిస్తున్నట్లు తెలుస్తోంది. ప్రభుత్వం ఈ నిర్ణయం తీసుకుంటే మాత్రం షావోమి, రియల్‌మి సహా పలు కంపెనీల తీవ్ర ప్రతికూల ప్రభావం పడనుంది. కాగా మరోవైపు చైనా స్మార్ట్‌ఫోన్ కంపెనీలు దేశంలో పన్ను ఎగవేతకు పాల్పడుతున్నాయనే ఆరోపణలు ఉన్నాయి.

చైనా ఫోన్లు కొనొద్దనే పోస్ట్‌లు మనకు సోషల్ మీడియాలో అప్పుడప్పుడు కనిపిస్తూనే ఉంటాయి. చైనా ఫోన్లు కొనొద్దనే అంశంపై ఒక్కొక్కరు ఒక్కోలా స్పందిస్తూ ఉంటారు. ఏదేమైనా చాలా మంది చైనా ఫోన్లను కొనుగోలు చేస్తూ ఉంటారు. దాదాపు ప్రతి ఒక్కరి చేతిలోనూ షావోమి, ఒప్పొ, వివో, రియల్‌మి, వన్‌ప్లస్, ఐకూ వంటి బ్రాండ్లకు సంబంధించిన ఫోన్లే కనిపిస్తూ ఉంటాయి. ఇవ్వన్నీ చైనాకు చెందిన ప్రముఖ స్మార్ట్‌ఫోన్ తయారీ కంపెనీలే. అయితే ఇప్పుడు ఒక విషయం తెగ వైరల్ అవుతోంది. కేంద్ర ప్రభుత్వం చైనా ఫోన్లపై నిషేధం విధించబోతోందని నివేదికలు వెలువడుతున్నాయి. అయితే ఇది పూర్తిగా కాదు.

చైనాకు చెందిన స్మార్ట్‌ఫోన్ తయారీ కంపెనీలను రూ. 12,000 కన్నా తక్కువ ధర ఉన్న ఫోన్లను దేశీ మార్కెట్‌లో విక్రయించకుండా నియంత్రించాలని కేంద్ర ప్రభుత్వం ప్రయత్నిస్తోందని నివేదికలు వెలువడుతున్నాయి. ఈ నిర్ణయం వల్ల వన‌ప్లస్, ఐకూ వంటి ప్రీమియం బ్రాండ్లపై కాకుండా ఇతర చైనా కంపెనీలపై ప్రభావం పడే అవకాశం ఉంది. షావోమి, రియల్‌మి వంటి కంపెనీలపై ఎక్కువ ఎఫెక్ట్ పడే ఛాన్స్ ఉంటుంది.


నివేదికల ప్రకారం చూస్తే.. ప్రపంచంలోని రెండో అతిపెద్ద మొబైల్ మార్కెట్‌ కలిగిన భారత్‌లో లోయర్ సెగ్మెంట్ నుంచి చైనా దిగ్గజ స్మార్ట్‌ఫోన్ కంపెనీలను బయటకు పంపాలనేది ప్రభుత్వ లక్ష్యంగా కనిపిస్తోంది. దీనికి ప్రధాన కారణం రియల్‌మి సహా పలు బ్రాండ్ల వల్ల స్థానిక తయారీ కంపెనీలపై తీవ్ర ప్రతికూల ప్రభావం పడుతోంది. ఒకరకంగా చెప్పాలంటే ఈ కంపెనీలు దేశీ సంస్థలను అణగదొక్కుతున్నాయనే ఆందోళనలు, అభిప్రాయాలు ఉన్నాయి.

ఈ ఫోన్లపైనే బ్యాన్ ఎందుకు?
భారత్‌లో స్మార్ట్‌ఫోన్ కొనుగోళ్లు భారీగా నమోదు అవుతూ వస్తున్నాయి. దేశంలో విక్రయమయ్యే ఫోన్లలో ఎక్కువ మంది కొనేది మాత్రం రూ. 12 వేలలోపు ఫోన్లనే. 2022 జూన్ త్రైమాసికపు ఫోన్ల అమ్మకాలను గమనిస్తే.. ఇదే విషయం అర్థం అవుతుంది. ఈ విభాగంలో ఫోన్లలో చైనా కంపెనీలే ఏకంగా 80 శాతం వాటాను ఆక్రమించాయి. దీంతో కేంద్ర ప్రభుత్వం కూడా ఈ విభాగంలో చైనా కంపెనీలను అడ్డుకోవాలని చూస్తున్నట్లు నివేదికలు పేర్కొంటున్నాయి.

ట్యాక్స్ ఎగ్గొడుతున్న చైనా కంపెనీలు
కాగా చైనా స్మార్ట్‌ఫోన్ తయారీ కంపెనీలు భారత్‌కు భారీ మొత్తంలో ట్యాక్స్‌కు ఎగవేశాయనే ఆరోపణలు ఉన్నాయి. కేంద్ర ప్రభుత్వం ఈ అంశంపై దర్యాప్తు కూడా చేస్తోంది. ఇప్పటికే దిగ్గజ కంపెనీలైన షావోమి, వివో, ఒప్పొ వంటి వాటికి నోటీసులు కూడా పంపింది. ఈ కంపెనీలకు మన దేశంలో అమ్మకాలు భారీగా ఉన్నాయి. అయితే పన్ను చెల్లింపులు మాత్రం చాలా తక్కువగా ఉన్నట్లు కేంద్రం భావిస్తోంది. ఈ సంస్థలు చైనాలోని పేరెంట్ కంపెనీలకు భారీ మొత్తాన్ని పంపుతున్నట్లు కూడా ప్రభుత్వం గుర్తించింది. ఈ తరుణంలో ఇప్పుడు ఫోన్లపై బ్యాన్ అంశం తెర పైకి రావడం గమనార్హం.

LEAVE A REPLY

Please enter your comment!
Please enter your name here